Äme traumhafte Samstigmorge Afangs-September hend sich ufem Pauseplatz in Wald jungi, motivierti Turner und Turnerinne gfunde zum mitenand e lässigi Turnfahrt z’verbringe. Würklich gwüsst, wo üs d’Reis aneführt, het kuum öpert. A de Mengi Bier wo die Turner mit in Reisecar gno hend, het mer chöne meine, sie seged e Woche unterwegs.
Während ufem Weg fortzue alli ufglade worde sind, hend die erste d’Jasskarte füregno und agfange Jasse. Die rund 1.5-stündig fahrt isch wie im Flug vergange und scho simmer am Ziel ahchoo. Mir sind im Kanton Schwyz. Die wo während de Fahrt no nüüt gesse gha hend, sind denn au die erste gsi, wo sich nocheme Restaruant erkundigt hend. Im Restaurant Laguna Bay, gad nebet em Ahkunftsort, hemmer üs denn gstärkt und sind parat gsi für de Nomittag.
Diejenige wo die erwünscht Summerbrüüni nonig erreicht gha hend, sind bi dene Sommerliche Temperature bare Buuch uf d’Liegestüel gläge und hend echli usgrueht. Es isch ruhig gsi, bis mer ufzmol e Stimm ghört het: 15… 14… 13… Jedem hinterletzte isch i dem Moment klar worde, «Jetzt mueni seckle». Quer durs Restaurant oder eifach möglichscht wiit weg, jede het sich versteckt und es isch eigentlich jedem gliich gsi, wiener nochher usgseht. Noch dene paar Rundene «15, 14» isch denn de nöchscht Programmpunkt au nüme wiit gsi.
Nochere chliine Verschnuufpause hemmer plötzlich Dudelsack Musig ghört und en Maa i de Schottische Tracht het üs begrüesst. Nochdem mir selber alli so e Tracht ahgleit hend, hend mir üs gruppewiis dur en Postelauf voller Schottische Nationalsportarte kämpft. Axtwerfe, Pfiil und Bogeschüüse oder Holzstammwerfe, alles hemmer chöne mache. Die Mannschafte wo am beste im Allround-Schottland-Parkour abgschlosse hend, sind denn qualifiziert gsi fürs Final im Tauzüche. Alles hend die Turner geh und d’Sieger hend nebet eme Horn, womer drus cha trinke, d’Ehr übercho, zum de Bricht z’verfasse.
De spöter Nomittag hemmer denn binere Poolparty im Dorf dörfe verbringe. Mir hend grillet und badet und de herrlich obet eifach gnosse. Während die eine mitem Mini-Tramp waghalsigi Sprüng in Pool gmacht hend, sind die andere vom Dach gsprunge oder eifach im Whirlpool gsesse.
Zum de Tag abrunde sind mir am Obet denn no inen Club und hend ghörig g’Fäschtet. Leider het de Autor vo dem Bricht us unerklärliche Gründ nüme äse viel Erinnerige vo dem Obet, aber ihr wüsseds jo sicher no, als wärs Gester gsi.
Übernachtet hemmer ime Masselager ufeme Hof und am nöchschte Morge simmer döt miteme feine z’Morgä-Buffet begrüesst worde. Nochem esse hend die eine ide Morgesunne usgrueht und die andere hend probiert, de Obet z’rekonstruiere. Plant wär gsi, zum no im See go bade, jedoch isch de Wege Blaualge gsperrt gsi und so simmer als Abschluss i de Thur go bade und noch de Zugfahrt uf St.Galle isch da herrliche Wuchenend mitem TV-Wald scho wieder verbii gsi.
0 Kommentare